政壇：搞搞政：行會冇份葉劉變噴火龍

新行政會議名單公布後，新民黨主席葉劉淑儀甩轆，內中唔會冇文章，而葉劉近日嘅表現更有一改早前挺梁作風之嫌，不但掉轉槍頭狂踩新政府接二連三爆發誠信危機，尋日更透過自己發迹嘅匯賢智庫一個講座上連環掃射，狠批林煥光考慮辭去行會召集人一事太過兒戲，又叫特首梁振英（CY）盡快搞掂新班子誠信問題，火氣咁猛，直頭好似噴火龍咁。

葉劉尋日大開殺戒，連相識多年嘅政府舊同事林煥光及發展局局長麥齊光一樣冇面畀，話雖然同林煥光分屬好友，但當佢聽到林考慮辭去行會召集人時，第一個反應竟然係：「你兒唔兒戲啲呀！」表示無理由做咗召集人唔夠一個星期就劈炮唔撈，又話如果CY唔盡快搞掂新班子嘅誠信問題，將會不利新班子嘅強政勵治喎。

新班子上任就有咁多不利消息，有傳CY下星期會推出一系列惠民紓困措施谷民望，葉劉就警告新政府唔好亂派錢花盡庫房積蓄。翻查紀錄，政府去年提出向每位市民派六千元，當時第一個跳出嚟支持嘅就係葉劉，佢尋日竟然話政府唔可以攞晒納稅人啲錢去派糖，又話咁係違反審慎理財原則，實在難以理解。