政壇：范國威出戰搵八人抬轎
由民主黨分裂出嚟嘅新民主同盟舊年區議會選舉表現唔錯，喺新界東贏得八個議席，恨選立會好耐嘅西貢區議員范國威（Gary）今屆有冇得喺新界東當選呢？據講有政黨做嘅民調顯示，Gary嘅立會選舉支持度極低，因此白鴿黨先至夠膽喺新界東派出三張名單參選，擺明當舊黨友Gary冇到啦。
為咗力撐Gary，新同盟尋日宣布將用盡新界東參選名單嘅九個名額，排晒其餘七名區議員再加一名黨員去抬轎，打破歷來同一名單參選人嘅紀錄，目的都係攞盡支持票啫。
講開抬轎，同樣參選新界東嘅自由黨榮譽主席田北俊，據聞選情亦未許樂觀，要出動原已決定棄選嘅副主席周梁淑怡排喺名單第二位。周太仲會搵埋佢當年做電視台識落嘅老牌演藝界人士助選，幫田少拉多啲師奶票。
范國威（左二）搵咗八名黨友排喺參選名單，為自己抬轎。