政壇：黃錦星激將法推垃圾費

近年香港喺好多方面都被人批評發展步伐緩慢，環境局局長黃錦星尋日出席一個活動時有感而發，佢本嚟係推銷垃圾徵費嘅，話今年下半年就會發表報告，喺香港引入呢個機制，佢話首爾同台北市引入垃圾收費十年喇，就連同香港好近嘅廣州呢個月起都開始部分地方實施，香港應該同呢啲地方看齊喎！

港人習慣口頭環保

黃錦星早兩日出席立法會時，已經回應過垃圾徵費，話佢哋進行嘅固體廢物收費諮詢顯示，有六成受訪嘅港人都支持垃圾徵費，意思係垃圾徵費有強大民意基礎，佢仲話，政府會喺垃圾回收、善用廚餘方面推動多啲，希望更多人加入支持垃圾徵費。

尋日佢出席一個活動又提垃圾徵費，仲話下半年就會發表報告，上任一個禮拜，黃錦星一步一步嘅鋪排，都係瞄準垃圾徵費，睇嚟呢個實係佢上任第一把火。只不過，佢尋日嘅推銷就明顯有地區競賽嘅意思，一方面指摘本港落後過首爾同台北，一方面又激吓香港人，再唔落實徵費，真係衰過廣州都有之，佢呢招激將法有冇用暫時未知，但佢有意頭炮進攻垃圾徵費就盲嘅都睇到。

黃錦星未上任已被喻為環保先鋒，尋日講到喺本港推行垃圾徵費計劃時，佢都流露咗對本港遲遲未能落實徵費計劃嘅恨鐵不成鋼遺憾。又係嘅，香港喺好多環保設施上都落後歐美，依家連韓、台都不如，如果遲吓仲衰過廣州，香港人真係要檢討吓我哋到底係口頭環保，定係真心想環保喇。