特貪之首離港 廉署慎防走犯

痛心特首曾蔭權有個鼎鼎大名嘅外號，叫氣候逃犯。其實，背負一身貪腐醜聞嘅佢，更加係一個貪腐逃犯。

貪曾之名實至名歸，但點解係逃犯呢？因為佢真係捲席而逃囉，一落台即刻雞咁腳離開香港，遠走高飛。

前晚喎，深宵時分夜闌人靜，貪曾夫婦突然鬼鬼祟祟現身下榻酒店嘅地牢貨物起卸區，然後又急急登上一架政府車輛。做乜呢？原來係掩人耳目去機場，搭凌晨航班離港，如果唔係畀本報記者撞破行蹤，人間蒸發咗都無人知。

大家係咪覺得奇怪呢，坐飛機離港啫，使唔使好似做賊咁呀？嗱嗱嗱，話唔定貪曾真係作賊心虛。一來貪曾嘅貪腐醜行罄竹難書，全城共憤，離港可能就係要逃避市民嘅痛罵聲音。二來咯喎，廉政公署已經立案調查佢嘅貪腐問題，大家話呢位「特貪之首」會唔會驚到無鞋挽屐走呢？你知啦，外國貪污首長一落台就被秋後算帳，例子屢見不鮮，台灣陳水扁就係樣辦。家陣貪曾摘下烏紗，再無特權護身，喺寢食難安之下希望逃之夭夭，絕對符合貪曾嘅逃犯心態。

嗱嗱嗱，如果落難逃犯想着草，今次唔使環保團體出通緝令，捉拿逃犯歸案嘅重責就交畀廉署啦。各位廉政先鋒，同貪官算帳唔使等到秋後o架，愈快行動愈好，無謂畀貪腐逃犯有時間甩身，消滅罪證，逍遙法外吖嘛！

講起都諷刺，貪曾鬼祟離港，選擇喺夜闌人靜中行事，而佢搬離禮賓府，就被民間一片響徹雲霄嘅怒罵聲包圍。一個政治人物落得咁嘅下場，都算折墮，不過佢無得怨人，只能怪自己心術不正，自食惡果。就算唔計「曾商勾搭」呢一筆，揮霍民脂民膏窮奢極侈已經足以令佢成為人民公敵。

本報踢爆，貪曾過去五年瘋狂外訪遊埠五十五次，燒咗逾千萬元公帑，原來只係冰山一角咋，唔少隱性開支根本未被揭露。例如陪貪曾出訪嘅新聞處，單係上年就花費納稅人三百一十萬元，開支增長以倍計，相信同貪曾卸任前盡地一貪有關。大家話嘞，如果貪曾逍遙法外，香港人條氣點順呀！

一句講晒，特貪之首離港，廉署慎防走犯，唔好猶豫嘞，即刻行動，就算貪腐逃犯逃到天腳底，都要將佢繩之以法，叮！