政壇：搞搞政：行會機密文件電子化

作為特首內閣嘅行政會議負責就重要政策拍板，班成員可以話係掌管最多高度機密資料，所以保密工夫絕對唔可以馬虎。

為防範機密資料外洩，行會多年嚟都有唔同措施，以往做法係向每位行會成員提供一個夾萬，政府每逢禮拜六就會派專員送行會機密文件畀各成員，成員閱畢文件就放入夾萬內保存，以備每逢禮拜二開行會之用。至於夾萬放置喺邊度就隨成員鍾意，所以唔少行會成員都會禮拜日喺屋企慢慢歎文件。

據聞，自政府遷入新總部後，為配合無紙化，行會嘅機密文件亦要電子化，當局決定為每位成員添置專用電腦，成員必需透過專用電腦至可閱覽文件，而專用電腦唔會連接互聯網，唔怕被黑客入侵。專用電腦設有登入密碼，即係有人偷走電腦都好，唔怕行會機密內容通晒天。佢哋最初只獲編配一部電腦，但礙於有成員要公司屋企兩邊走，所以最後加多部電腦方便啲。