政商定格：郎朗初登銀幕駕輕就熟

世界鋼琴家郎朗最近擔正做電影男主角，尋日搞慈善首映，為香港女童軍籌得二百萬元善款。郎朗嘅魅力沒法擋，城中名媛淑女暈晒浪，紛紛拎出相機爭住同偶像合照。

郎朗初登大銀幕就駕輕就熟，事關佢喺戲內演一個熱愛古典音樂嘅角色，簡直度身訂造，演出冇難度。但目前最想專注嘅依然係彈鋼琴，除咗巡迴世界各地表演外，仲拍住港島婦女聯合會主席Carol張雅麗同前經理人黃錚，喺深圳開設首間音樂學校，學院年初已招生，敲門者絡繹不絕，郎朗話稍後將進軍重慶、上海同北京等地開分校。Carol同郎朗已變成契姐弟關係，啱傾到極。Carol大爆郎朗開騷前，原來最愛食東北餃子。

首映禮人山人海，場內見到恒生銀行前女大班梁高美懿一家外，仲見到女童軍香港總監彭徐美雲帶埋公子彭穎生同榮升太平紳士嘅老公彭曉明撐場。彭太八月初帶隊坐火車去絲路，同行有幾百個女童軍，心情雀躍，佢話預咗未必日日有涼沖，所以買定大包濕紙巾、高度防曬霜及蚊怕水。