政壇：梁福元被封元朗皇帝
政圈一直有「得鄉事，得天下」嘅說法，每逢立法會選舉，尤其係新界戰場，鄉事派就成為搶手貨，好似盛傳會出戰新界西嘅城鄉居民共和協會會長陳強，尋日出席一個酒會時都話新界有兩個皇帝，一個係鄉議局主席劉皇發，另一個就係「元朗皇帝」。邊個嚟o架？
陳強喺酒會上見到十八鄉鄉事委員會主席梁福元，即刻大讚佢，講講吓陳強仲起咗個名，叫佢做「元朗皇帝」。梁福元聽到後好似幾受落，反客為主話其實陳強先至犀利。梁福元話自己細細個讀完書，陳強已經好有成就，近年仲衝出元朗，連荃灣都好多人識。
兩人互送高帽一輪後，終於入正題講選舉，可能梁福元太開心，即場話元朗五個鄉都會支持陳強，搞到陳強四萬咁口。其實鄉事派對住多方面都話會幫手，但最終有幾多個真係兌現承諾，到九月就知道。
梁福元（右）個髮型已經夠高，估唔到陳強仲要向佢送高帽。