政壇：騰雞美華成三朝元老

特首CY梁振英嘅問責團隊有多張新臉孔，但我哋發現自○三年六月起出任民政事務總署署長嘅陳甘美華（騰雞美華），竟然又順利過渡到新政府，成為極少數喺同一崗位連續服務九年嘅官員，亦係回歸後三任特首嘅「三朝元老」。CY尋日連同部分問責官員落區聽取市民意見，但騰雞美華並冇陪同落區，只係出席新界各界人士回歸酒會。

翻查資料顯示，現年五十六歲嘅騰雞美華，喺○三年六月接替人稱「媽打」嘅李麗娟出任民政事務總署署長後，官運就好似靜止咗咁，過去九年幾一直原位留任，任期仲長過之前兩個特首。

眾所周知，政務官一般每三、四年會調遷一次，按道理佢應該調遷至少兩次，但佢反其道而行，繼續坐喺署長呢個位，究竟係咪正如我哋接到嘅投訴所講，冇其他政策局肯收留佢呢？定係佢另有原因唔想調職呢？呢個謎相信只有當事人同政府至知。