政壇：港人大競逐立會 推遲內地考察

三十六名港區全國人大代表每年都會定期到內地考察，按照不成文慣例係每年七月訪問內地約八至十日，但今年至今卻遲遲未有聲氣，據聞呢個同有關方面安排不當完全無關，最主要嘅原因係有好多人大有意參加九月立法會選舉，而立會提名期由七月十八號展開，到九月九號投票，所以佢哋未必可以喺呢段時間突然行開，所以索性稍為推遲今年嘅考察團喎！

每次立法會選舉都有好多新舊面孔參選，今年九月立會選舉亦唔例外，多名親中色彩較濃嘅港區全國人大代表有意分一杯羹，好似執業大律師廖長江、中銀高層「星爺」吳亮星同藝術發展局前主席馬逢國，分別有意出戰中總、金融同體育界；至於曾喺○八年打富貴黨旗號參選九龍西直選落敗嘅新民黨副主席田北辰，更有意捲土重來轉戰新界西直選。

黃國健劉健儀瞓身連任

事實上，現屆立法會議員都有多人身兼港區全國人大代表，好似工聯會黃國健、航運交通界劉健儀等都會競逐連任，其中後者更對轉戰港島直選蠢蠢欲動，睇怕只會有更多人大加入「日以繼夜，夜以繼日」同選民接觸嘅行列，要瞓身拉票，仲點會得閒吖！

據聞有關方面有見及此，決定從善如流推遲考察行程，至於今年考察團最終幾時能夠成行，相信都係喺立會選舉之後嘞，有消息話最快會喺十月去雲南喎。

講開疑似候選人，星爺同我哋講，自己對係咪參選已經如箭在弦，適當時間會公布；而廖長江亦罕有開腔，表示正積極考慮參選。