SUN微博：打橫嚟講：慶回歸

如果不是香港傳媒的不斷報道，又若非警方浮誇的架設高大的水馬長城，或前特首曾蔭權豪搬大量貴價茅台和傢俬撤離「禮崩府」，相信，七百萬的香港人都感覺唔到親歷在回歸十五周年的重要時刻當中！

鬼咩！呢十五年來，香港未見有好日子過，全港市民只顧為口奔馳，哪有心情笑幾秒吖？講實話，大家都忙到不知時日過，每天放晒精力去憂柴憂米又一日矣！

本來，若然，政府了解民心的話，會在呢個有國家主席來港祝賀及見證的時刻，應好好做番啲嘢，話刻意宣傳又好，提醒大眾也好啦！最低限度，喺幾條街燈燈柱頂，掛張旗仔充撐吓場面吖！呢個貪曾就乜都唔做，特意令香港無歡樂氣氛。

唉！連清明掃墓日子，政府新聞處也會推出宣傳片，叫人小心香燭，提防山火啦！回歸十五周年，同新政府轉屆咁大件事，仲衰過拜山，竟一啲該做嘅嘢都唔做，粉皮煲呔擺明臨走要玩嘢兼搞對抗。

十五年家國，苦多甜寡，跌重升微，悲的傷，喜的少。人生有幾多個十五年呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係敢爆」網址tv.on.cc/hot