政壇：政商定格：CY幫到手施榮懷醒神
沙田馬場尋日有三項盃賽盛事，其中廠商會嘅回歸紀念盃，會長施榮懷率領一眾高層連嘉賓逾二百人，塞爆會場。對於新特首梁振英一上任就話關注內地港商嘅發展，佢聽見醒神晒，期待新班子有創新扶持措施，帶大家乘風破浪。
副會長吳永嘉就報喜話，康文署已初步批准該會於十二月十五號，繼續喺維園搞工展會。不過咪開心得太早，由於今年政府要求租場費用同入場人數掛鈎，勢必導致租金大幅調升，連同保安、清潔、搭建攤位等費用亦加價至少百分之十。佢話佢哋唔想大幅加門券價格，惟有調高參展費用。之不過羊毛出自羊身上，最終只有苦了升斗市民。
施榮懷（右五）與楊孫西（左五）、黃友嘉（右三）、林大輝（左三）、顏吳餘英（右二）、盧文端（左一）、徐炳光（右一）同一眾工展小姐齊出動頒獎。（受訪者提供）