政壇：搞搞政：建制派怕選輸暗阻重組

特首CY梁振英將政府重組成五司十四局，目前有待立法會大會同財委會撥款通過，由於依家主要只得人民力量拉布，所以係咪可以喺十八號前通過，其實都好睇建制派有冇幫手，但最近都唔見建制派出招，據聞原來佢哋都唔係好想重組架構通過，希望拖得就拖。

建制派嘅如意算盤係，如果佢哋一早通過咗方案，一旦CY班子因而民望下滑，好可能拖累埋建制派喺九月嘅立法會選情，變相益咗泛民。

所以有幾位建制派議員，曾經勸過CY唔好夾硬推重組架構方案，仲有人叫CY撤回方案，有乜事都等選舉結果塵埃落定時，再配合十月施政報告提出，以免建制派選情被拖累，講到尾都係為咗一己私利。

但如果方案去到十月先提出，咁起碼拖半年到明年四月先上場，好多民生事務變咗唔係由CY心目中嘅人選去做，到時做得唔夠好，CY被市民批評，班建制派係咪會負責先？講到尾，選舉稱得上係政黨嘅照妖鏡。