政壇：鬍鬚曾：面臨險境

特區政府新班子尋日宣誓就任，當中包括咗被嘲為「史上最廢財爺」嘅鬍鬚曾，而佢亦第一時間喺個人網誌上面講感受，不忘感謝特首CY梁振英同中央嘅支持同信任，令佢繼續留低做財爺，唔單止感到責任重大，佢甚至有啲面臨險境嘅感覺添。

任內年年計錯數

吓！佢身陷險境？佢話險就係香港同環球嘅政治、經濟正面臨巨大變局，香港會受好大衝擊，所以不得不為未來幾年可能面對前所未見嘅挑戰而作好準備。唉！呢番說話之前已講過好多次，講到好風高浪急咁，十足十佢以前發表預算案之前，不斷「狼來了」嚟壓低市民對派糖嘅期望咁。

跟住佢話香港喺經濟下行壓力、同超低息環境引起嘅資產泡沫下，個別行業會收縮，香港嘅社會矛盾可能因此更為尖銳，而面臨嘅風險雖然巨大，政府唔可以坐以待斃，而要好似CY喺政綱提出嘅「穩中求變」咁，爭取經濟增長，但呢啲並非易事，於是佢就提出自己未來三項工作重點。

咪以為佢有乜新猷，原來又係嗰三樣：量入為出，應使得使；拓展經濟，改善民生同埋增推土地，平穩樓市。老實講，佢咪以為大話講一百次就變成真話，呢三樣嘢都係佢前五年任期內要做嘅，但結果係點？佢年年計錯數，派錢派到亂晒龍，出咗好多招但樓價依然高企，畀市民鬧爆。

鬍鬚曾既然有幸留低做財爺，咁就希望佢真心去做，而唔係只係執CY口水，表面上講穩中求變，但佢拙劣嘅財政哲學同政治伎倆就唔改，若果再係咁落去，睇怕好似外界揣測咁，佢未必做得完未來五年任期嘞，對佢嚟講呢樣先係兇險。