庸官身敗名裂 香江送走瘟神

年年回歸日，今年特別爽！點樣爽？港人送走瘟神，驅散邪氣，不堪回首嘅「貪曾七年」成為歷史，你話爽唔爽吖！

市民大眾開心之日，就係貪官庸吏難受之時。「痛心特首」曾蔭權爵士用「百感交集」形容執包袱走人嘅心情，咁又難怪嘅，從此告別禮賓府，告別曾朋友，告別私人飛機和私人遊艇，告別總統套房，唔百感交集至奇喇。更何況，下台之日即係秋後算帳之時，煲呔曾貪腐醜聞纏身，自己知自己事，惶惶不可終日完全可以理解嘅。

七年一覺特醜夢，贏得貪曾臭罵名，貪曾衰收尾完全係咎由自取，與人無尤。其實，上樑不正下樑歪，同貪曾一樣身敗名裂嘅前朝庸官多的是，呢，前食物及衞生局局長周一嶽就係人辦嘞。

周一嶽渾渾噩噩，出咗名「每周一鑊」，撞板多過食飯，民望衰到貼地，同貪曾有得揮。所以咯喎，新政府上場，佢眾望所歸，無得留低，早就預咗嘅喇。無可奈何花落去，佢此時此刻嘅心情一定好似煲呔曾咁百感交集，同病相憐。

係人都知，周一嶽一向官癮爆燈，當初梁振英勝選，佢多番暗示想「再坐一會」，恨留低恨到出晒面，點知竹籃打水一場空，最終都被叮走，真係瘀到痹。

人貴有自知之明，周一鑊在位八年，孭鑊足足孭咗八年，佢所管轄嘅範疇全部搞到一塌糊塗。公立醫院管理混亂，醫療醜聞無日無之；雙非孕婦逼爆產房，本地孕婦一床難求；食物問題接二連三，港人以食為憂；骨灰龕位供不應求，違規龕場遍地開花。一句到尾，港人生唔起、住唔起、病唔起，甚至死唔起，都係多得佢咋！

周一鑊唔止無能，更甘當港英餘孽打手，迫害正義傳媒，打壓新聞自由。東方報業集團為民喉舌，針砭時弊，鞭撻貪官庸吏，被當局視為眼中釘，周一鑊充當急先鋒，唆使轄下衞生署同食環署等部門，不斷對東方進行滋擾同恐嚇，公報私仇，其心可誅。

話時話，國家領導人訪港，有記者因大聲發問被警方帶離查問，有人指係妨礙新聞自由喎。其實，東方報業多年來被餘孽政府肆意迫害，呢啲先至係如假包換嘅打壓新聞自由嘞。

無論點都好喇，多行不義必自斃。香港「第一貪官」同「第一庸官」終於被民怨洪流沖落歷史垃圾堆，港人終於守得雲開見月明，真係飲得杯落。周一鑊，一路好走，睇住你隻鑊吖，叮！