政壇：蔡加敏力撐男士侍產假
「玩具大王」蔡志明嘅愛女蔡加敏（Carmen），早年下嫁佳寧娜飲食集團太子爺馬鴻銘後，先後誕下寶貝女靄翹及一對孖仔，日前佢出席一個活動時，就話到明好支持政府就男士侍產假立法，等男士多啲時間照顧太太。
Carmen話當年佢懷孕時，老公雖然工作好忙，都好關心佢，自己亦諒解老公工作繁重同應酬，調整心態，佢仲呼籲孕婦如果真係有煩惱，最好同已為人母嘅女性朋友傾訴。講起愛女，Carmen就話囡囡開始鍾意女仔嘢，依家有學跳芭蕾舞同繪畫，仲參加咗兒童合唱團添，唔知佢囡囡未來會否成為芭蕾舞家或音樂家呢？
