政壇：肥亨溝通神功授新官

第四屆特區政府主要官員今日開始履新，新班底中有五名官員係完全冇政府工作經驗嘅，外間對佢哋嘅疑慮亦特別重，曾經做過官場新人、仲上任冇耐就搞到要鞠躬道歉嘅前高官馬時亨尋日就為一班新人講句公道話，順便指點兩招，佢話依家嘅政治局勢愈來愈複雜，新官上場應該落區、處理好內部溝通，又多啲同立法會議員聯絡吓，馬時亨以過來人身份教導幾招，官場新秀不妨學吓嘢！

支持商務局一拆二

肥亨尋日出席一個電台節目，講到日前揭盅嘅司局長名單，被批評欠缺公共管治經驗，佢以過來人身份戥佢哋唔抵，仲話十年前佢初入政府時，一樣無乜人識佢，希望大家畀機會同時間啲司局長。肥亨話，新班子喺佢哋所屬嘅領域，都有一定經驗及成就，相信只要有心服務市民及有政治魄力，一定可以服務好香港。

講起做官嘅歲月，肥亨自嘲當年政治智慧欠奉，撞唔少板，慢慢都磨練出啲經驗和教訓，知道點樣圓融處事。肥亨由鞠躬道歉到揮別官場時眾譽紛至，正正係內外上下溝通有道，所以佢畀啲新官錦囊都係「溝通」再「溝通」，一係落區同市民溝通，二係同政府內部嘅同事溝通，三係同所有立法會議員多溝通，至於從政，官員要展現工作能力，更要有政治胸襟，尤其係面對批評時。

講完對新官嘅睇法後，肥亨都明撐政府架構重組，仲好支持分拆商務及經濟發展局，事關佢以前做局長時，由於要兼顧嘅政策範疇甚廣，日日顧住救火，已經無時間處理長遠大計，所以肥亨認為拆做兩個局係好事。