迫害正義傳媒 貪曾自取其辱

糯米治木蝨，一物治一物。凡害蟲皆有天敵，對於人形害蟲嘅貪官嚟講，正義傳媒就係佢哋嘅剋星。唔怪得曾蔭權政府將東方報業集團視為眼中釘，亟欲打壓而後快。

港府點樣打壓東方呢？只有諗唔出，沒有做唔出，手段卑劣，無所不用其極。最大特色就係多部門參與、全方位夾擊，十足十群魔亂舞、醜態百出嘅「政治打壓大合唱」！

打頭陣嘅，一個叫電影、報刊及物品管理辦事處，個名咁拗口，其實就係出咗名選擇性執法嘅前影視處。另一個係藝術色情不分，將世界雕塑名作大衞像評為不雅物品，鬧出國際大笑話嘅淫審處。護淫孖寶學足貪曾親疏有別，至叻放生壹淫媒，專門針對東方。

呢，○五年底《東方日報》及《太陽報》刊出外國女星Kelly Brook嘅性感照，雖然按規定打上格仔，仍被淫審處評為二級不雅兼罰款。壹淫媒旗下爛果報刊出同一輯相，居然被評為一級非不雅。仲有呀，喺本港有售嘅外國雜誌《NOW》，無遮無掩刊出同一輯相片，當局連送檢程序都慳番，評級更加唔使講。同一輯照片三種評級標準，港府淫審變護淫，簡直係香江奇譚，叮！

你方唱罷我登場，唱完三重標準玩針對，輪到平機會同私隱署玩老屈。○七年，平機會竟然未核實投訴內容，就話有人指《太陽報》歧視殘疾人士，原來又係無中生有。講到屈得就屈，私隱署亦唔輸蝕，當年東方旗下刊物一張街頭女士衣着潮流相，居然畀佢哋控告「侵犯個人私隱」，法官最終判東方勝訴，私隱署嘅陰謀先至唔可以得逞。

選擇性檢控沒完沒了，滋擾性調查無日無之，當局究竟有乜嘢政治目的，明眼人一睇就知。正如全國政協委員劉夢熊話齋，當局針對以監察政府為己任嘅東方，視正義傳媒為眼中釘，令淫審制度淪為政治打壓嘅工具。

講開又講，壹淫媒歷年觸犯《淫褻及不雅物品管制條例》罪成過百宗，但鋪鋪罰款一萬幾千算數。面對檢討淫審制度嘅呼聲，當局虛應故事，第二階段檢討拖足三年至展開，等諮詢完成，貪曾早已經做緊寓公，淫審改革變咗新政府嘅燙手山芋，問你服未？

邪不能勝正，無論貪曾點樣放任各部門迫害正義傳媒，最終都係自取其辱。東方連環踢爆煲呔曾貪腐醜聞，令佢原形畢露，身敗名裂，呢啲咪叫做多行不義必自斃囉，叮！