政壇：搞搞政：被批無誠信梁卓偉扯火

貪曾早前被審計報告話佢豪華外訪大花筒，卸任在即嘅特首辦主任梁卓偉尋日最後一次去立法會回應議員對貪曾嘅批評。白鴿黨李華明批評特首私人秘書獨攬大權，又大鬧貪曾外訪時用自己張信用卡簽帳儲分係冇晒規矩，甘乃威亦批評佢嘅解釋只係狡辯，誠信有問題，搞到佢即時黑面扯火。

梁卓偉話議員可以批評佢任內邊啲地方做得唔好，但絕對唔接受議員質疑佢嘅誠信同話佢狡辯，又話自己作為特首辦主任，喺呢件事上係責無旁貸嘅。後來佢情緒穩定啲後，先至用番正常語氣話，當局會研究用公司信用卡畀錢嘅可行性，亦已草擬好新外訪指引，今日會交畀候任特首辦盡快落實。

朝早為貪曾扯晒火，尋晚佢又要搞門面工夫喺禮賓府搞聚會歡送貪曾兩公婆，認真可憐。事後特首辦將歡送會嘅相片上載到社交網站facebook專頁，即惹來網民鬧貪曾厚顏無恥！