政壇：鄭志剛38888食盡婚嫁潮
好多人都搶住喺龍年嫁娶或生BB，新世界發展主席鄭家純兒子Adrian鄭志剛睇準商機，推出周大福金鑽婚嫁首飾套餐，連金飾同鑽飾，畀三萬八千八百八十八港元意頭價就掂。Adrian工作出名勤奮，絕無富家子習性，尋日佢就出席全國青聯喺灣仔會展舉行回歸十五周年座談會，以全青副主席身份發言，認真畀面。
Adrian近排忙於推銷旗下新樓盤，忙到瘦咗幾磅，但愈忙愈High，婚嫁首飾市場，都畀佢度到絕世好橋，以靚價「包裝」準新娘，等佢哋嫁得有陣勢。由於工作太忙，Adrian嘅充電大計都要推遲到八月，佢話好想同太太暢遊中東及西歐，遠離煩囂都市。
鄭志剛（右）同陳仲尼（左）合力為全國青聯省靚招牌。