政壇:人民力量七成員突退黨

人民力量副主席兼元朗區議員麥業成,尋日聯同五名「泛藍」成員宣布退出人民力量,而曾經喺○八年同黃毓民合組一張名單參選九龍西嘅李偉儀,亦以協助麥業成參加九月立法會選舉新界西選區為由,宣布退出人民力量。

麥業成話,六月中黨團通過佢同「大舊」陳偉業分拆兩張名單出戰新界西,但呢個決定令支持者憂慮人民力量會喺新界西全軍覆沒,擔心分拆兩張名單會影響大舊嘅選舉工程,為咗唔想大舊再浪費時間安撫支持者,所以佢決定辭去副主席及執委會所有職務。李偉儀亦同時發出新聞稿宣布退黨嘅決定,佢話由於要協助麥業成備戰立法會選舉,為免選舉工作會對人民力量造成尷尬,先至決定退黨喎。

人民力量主席劉嘉鴻對麥業成同李偉儀嘅退黨決定感到可惜及遺憾,強調今次退黨不涉及任何黨內分裂或內訌,佢亦曾挽留兩人。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報