政壇：接市民申訴11議員捧蛋
仲有十幾日，今屆立法會會期就完結，又係時候為各議員埋單計數。現時立法會申訴部每星期會安排六位議員輪流當值，處理市民嘅意見同申訴。據立會秘書處記錄，發現有十一位「零個案」嘅議員，包括被封為「大懶蟲」嘅金融界李國寶、商界黃宜弘同體育、演藝、文化及出版界霍震霆。
「零個案」嘅建制派議員仲有地產建造界石禮謙、工程界何鍾泰、飲食界張宇人、工業界林大輝、工業界梁君彥，就連盛傳喺新一屆政府做副財政司長嘅會計界「波波」陳茂波都係一分子。泛民議員都大有人在，佢哋就係公文袋嘅法律界吳靄儀同新界東直選議員鄭家富。波波話自己一直對立法會申訴部轉交嘅個案採取「冇甩拖」嘅態度，唔明點解自己會排包尾喎。鄭家富就話議員辦事處已接咗好多個案，所以冇時間接立法會申訴部嘅投訴個案。