七年一覺特首夢 贏得氣候逃犯名

曾蔭權爵士治港七年，對環保毫無承擔，空氣質素愈來愈差，藍天白雲愈叫愈走。環保團體為貪曾埋單計數，結果只得四個字：劣評如潮！

以十分為滿分，環保團體對於港府環保政策最低只畀兩分，真係醜死怪，唔怪得貪曾畀人叫「氣候逃犯」，全民通緝咯。

環保人士直斥貪曾對環保嘅承諾「口惠而實不至」，淨係整色整水。係人都知，空氣質素有冇改善係衡量環保成果最客觀嘅標準。香港舊年錄得氮氧化物濃度竟然創下歷史新高，呢份就係貪曾嘅環保成績單嘞。

叮！貪曾一向將環保當做騷，停車熄匙搞到唔湯唔水，政策推出半年居然零檢控。係人都知，大型巴士係都市「毒霧」元兇，盡快轉用環保巴士，減排立竿見影，弊在當局齋噏唔做嘢，歐盟二期同三期專營巴士加裝催化還原器一拖再拖，依家都仲係「測試」、「研究」緊，問你服未。

貪曾所謂環保政策，查實只有一招拖字訣，拖拖吓夠鐘收工走人，過咗海就係神仙，關人個關。呢嗱，本港空氣質素指標仲係用緊廿五年前嘅老皇曆，煲呔曾拍晒心口話任內會收緊指標，點知拖到今年初至提出修訂方案，而落實仲要等多兩年，擺明算死草，留低隻黑鑊畀繼任人孭。

更離譜嘅係，當局扮晒嘢將細微懸浮粒子PM2.5濃度加入指標，但規範向低睇齊，香港空氣質素指標竟然衰過孟加拉，都咪話唔搞笑。調查顯示，貪曾上台七年，七千幾人死於同空氣污染有關疾病，平均每年死一千人，話貪曾間接害死人，一啲都唔過分，叮！

減排口惠而實不至，減廢同樣得把聲。推動膠袋徵稅姿勢大過實際，搵錢多過環保；強佔郊野公園做堆填區搞出個大頭佛，結果被迫撤回；建焚化爐霸王硬上弓，又以跪低收場；推動源頭減廢龜速牛步，講多過做；新廚餘回收中心話就話後年落成，原來連撥款都未批出，一個唔好彩隨時又夭折。

更離譜就係，貪曾其身不正，帶頭製造污染，破壞環保。呢，禮賓府耗電量年年飆升，變咗「吃電老虎」；推出慳電膽現金券又被踢爆有益親家之嫌，最終鬧劇收場。

七年一覺特首夢，贏得氣候逃犯名。貪曾只顧傍住富豪攞着數，懶理港人吸廢氣食灰塵，呢個禍港殃民嘅「氣候逃犯」，市民同佢算總帳嘅時候到喇，叮！