政壇:司馬文超級區會起風雲

公文袋嘅南區區議員司馬文本身係荷蘭人,早前被該黨基於佢仲未攞到中國護照為由,拒絕佢參選九月立法會區議會超級議席。但世事就係咁奇妙,佢話前日收到入境處通知,批准佢嘅入籍申請同發出入籍證書,下一步就會同個黨商討,希望佢哋會派佢出戰超級議席。

但該黨黨魁袋巾傑就話,上次召開嘅特別會員大會已決定唔派人參選超級區議會,佢哋會喺下個星期二開執委會時再傾呢個問題,睇下會唔會推翻上次決定。而佢承認重新畀司馬文參選嘅程序比較複雜,仲大鬧入境處突然轉軚好明顯係「玩嘢」,話佢哋打亂晒公文袋嘅選舉部署。加快批出都要鬧,依家啲人乜真係可以惡成咁?

如果司馬文最終參選,最大受害者將會係現時形勢落後嘅白鴿黨涂謹申。阿涂表示泛民如果真係派四人出戰,分分鐘會分薄票源,但阿涂對公文袋甚有信心,話公文袋最終一定會以大局為重喎!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報