政壇：民怨升溫佳叔自詡先知

中策組如果善加利用，就係特區政府做調查研究嘅後盾，否則就又做唔到嘢又嘥錢。首席顧問劉兆佳尋日接受電台訪問時解畫，話其實佢幾年前已意識到政府要加把勁做房屋同福利政策，例如增加撥地，但適逢金融風暴，政府主張走小心謹慎路線，所以冇吸納到佢嘅意見，搞到政策同市民期望有落差。加上樓價持續高企，高官又爆醜聞，所以民怨咪不斷升溫囉！嘩！依家咁講，除咗有啲事後孔明之外，仲好似暗插貪曾無聽佢意見。

佢又力數中策組功績，包括提出人稱「六大慘業」嘅六大產業同優化退休保障三大支柱。但講到一啲公認失敗嘅政策，好似問責制咁，佢就話只係執行上嘅問題。總之，一切佢都意識過、預示過、提出過，至於執行不善如此種種，負責喺象牙塔齋坐嘅佢都唔想！

即使政策失誤可以賴落政府執行不力，但有啲嘢點推都推唔甩嘅，好似佢上年回應史上最廢預算案時鬼拍後尾枕，話香港已陷「臨界點」咁。但佢「解釋」話，佢字典真係冇「臨界點」呢三個字，或者佢係睇得內地著作太多，搞到呢三個字入咗佢潛意識都唔知啩。