政壇:鄧國斌查貪曾受壓?

下屆政府新班子名單今日公布,預料會包括下任審計署署長人選。將於七一後退休嘅現任審計署署長鄧國斌尋日接受電台訪問,透露已見過繼任人,但唔肯講係邊個。佢寄語對方唔好受政治影響,即使審計署長係向特首負責,亦要企硬唔搞政治,又重申佢臨走前炮製個份貪曾瘋狂外訪報告中肯平衡,唔係特登針對任何人。鄧國斌唔通暗示緊喺佢調查貪曾時,有人喺背後作出政治干預?

貪曾報告夠中肯

鄧國斌喺訪問中表示,八年審計署長任期當中,特首從冇指示佢要調查某一政府部門或公營機構,唯一一次指明要調查嘅,就係貪曾嘅外訪住宿開支。講到貪曾好似好公正,好尊重審計署長嘅獨立地位咁。但其後佢又話鋒一轉,指做審計署長肯定會得罪人,被調查同批評嘅部門同官員難免會耿耿於懷,唔通佢係講緊貪曾?

對於外訪報告發表後加重咗貪曾嘅下台壓力,鄧國斌否認有意對任何人製造「殺傷力」,認為報告已做到中肯同平衡,佢都冇辦法控制傳媒同市民點樣解讀份報告。佢強調審計署嘅工作唔係「挖瘡疤」,而係幫受查部門「驗身」,及早改善管治同發現問題,否則有一日會「出血」,又指任何公職人員都需要接受「陽光測試」,做任何事都要「見得光」,能夠向公眾交代解釋。貪曾真係要聽清楚喇!

鄧國斌最後寄語佢嘅繼任人唔好受政治影響,不應被政黨左右調查方向,即使審計署長係向特首負責,特首亦不應因政治原因,要求審計署長做政治工作。唔通佢係感懷身世,不吐不快?鄧國斌預告退休後會先去旅遊,然後考慮做義工或者學者。梗係喇!佢任內得罪咗咁多高官,包括出名小器嘅貪曾,退休後想搵番一官半職撈吓都幾難囉!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白