黑灰白：高人繼續獨白

人誰無過，之但係認錯都要揀啱時間至得㗎。前排我咁緊張推個改組建議為乜？咪就係等上咗任快快趣趣搵齊人開工開倉派錢，多畀啲小恩小惠，乜嘢生果金、交津、綜援、乜補貼物補貼，無嘅變有，有嘅就加，泛民都唔敢出聲反對啦。久旱灑甘霖，何愁民心唔歸向？嗰陣先至逐件衰嘢慢慢揚出嚟，啲人要媽都媽得無咁大聲。依家班友响度阻頭阻勢，改組唔成仲顏面無光，底牌畀人揭起晒，真係賠了夫人又折兵，成世人都未試過咁丟架㗎。

好衰唔衰，嗰單花棚地下室雖然係小事一樁，但竟然喺呢幾日至爆出嚟。如果可以遲得一頭半個月至爆，件事就好做好多啦。仲有幾日就上任咯，大家都可以做得好好睇睇，寧畀阿爺知，莫畀阿爺見，求其過埋七一至見步行步。以前連國安局都查唔到我有間地下室，依家搞到街知巷聞，都唔知有幾多人打小報告去中南海？又唔知阿爺知道幾多？真係幾心煩。

單嘢撞正上京面聖，本來以為可以同領導人秉燭談天，講吓鴻圖大計，又講吓過幾日特區會點樣熱烈歡迎領導人到港訪問，特區喺我領導之下將會如何光明一片，扯旗山之下一片紅的光輝景象指日可期，如此先留下好印象，日後不愁不有求必應。依家上到去，都唔知講乜好，惟有問一句答一句，以免講多錯多。既然以前國安局都查唔晒我啲嘢出嚟，都算有啲失職，我都係應該堅持立場，乜都話無、話唔知、話唔記得，怕都唔會畀人屈打成招啩！不過，聽人講話上便鍾意坦白從寬、抗拒從嚴噃，又係咪乜都認晒會好啲？不如又可以考慮講啲唔講啲，等佢哋知啲唔知啲，不過應該講邊啲唔講邊啲……我自己都搞到亂晒大龍。

唔諗得咁多，總之乜都講多十次八次，就乜都會變真嘅呢。