為悲情城市解困 給蟻民一條生路

大家仲記唔記得，六年前天水圍有位小販走鬼跳河溺斃？曾蔭權政府就快收檔，市民驀然回首，諗起六年前嘅悲劇一幕，想到七年來嘅管治亂象，真係百感交集，悲從中來！

嗰位不幸嘅小販本來喺天水圍天光墟擺檔賣湯料賺取微薄收入，點知走鬼時被食環署職員窮追圍捕，走投無路之下被迫跳河，結果不幸溺斃。所謂我不殺伯仁，伯仁因我而死，小販嘅悲劇既係意外，亦係人禍，官府冷漠無情，刻薄寡恩，蟻民被迫走上絕路。

好嘞，事隔六年，呢類悲劇仲有冇呢？基層團體怒轟，貪曾禍港七年，港府政策向財團傾斜，官商勾結，草根階層民不聊生，就算做小販維生，都被趕入窮途末路。六年嘞，天光墟小販依然要冒住被追捕嘅危險擺賣養家餬口！

團體調查發現，五成六受訪市民贊成每區設立天光墟或午夜墟市，四成九人贊成設立假日露天市集。團體促請政府全面檢討小販政策，喺天水圍同深水埗等貧窮地區試行墟市計劃。

唉，小販擺檔自食其力，唔係偷，唔係搶，只要管理得好啲，注意環境及衞生，港府何必趕盡殺絕呢？唔通港產官僚真係咁冷血？唔通要重演慘劇先至知驚？叮你個鎯鎯，港府一向唔見棺材唔流眼淚，依家煲呔曾政府都行將就木啦，小販政策係時候重新檢討喇啩。

嗱，貧窮地區試辦墟市，為悲情城市減少悲情，真係諗得過㗎。香港貧富懸殊創下四十年新高，如果草根階層可以擺檔自力更生，綜援個案都少啲啦。尤其家陣通脹嚴重，衣食住行樣樣艱難，為升斗市民提供平貨，既幫到小販，又幫到市民，一舉兩得，何樂而不為呢？

歷史話畀我哋知，一個貧富懸殊，一個物價高漲，都係引發人民造反嘅動力。港產官僚若然食古不化，麻木不仁，繼續對自食其力嘅小販趕盡殺絕，唔通想官逼民反？咁喇，各位高官，為自己又好，為市民又好，放小販一條生路啦，唔該！

無論點都好喇，貪曾政權就快壽終正寢，大家總算守得雲開見月明，希望下屆政府撥亂反正，杜絕官商勾結，為基層市民做啲好事啦！