SUN微博：打橫嚟講：貪曾搬運術

香港特區政府轉屆在即，舊人離去新人上，本是正常，遂見快要「搣柴」的「打柴煲呔」，捲蓆鋪搬離「禮崩府」，聘用運輸工人抬上抬落，好似無乜嘢，不過，細心想深一層，咁！好不對勁喎！

何解？

喂！大佬！嗰度「禮崩府」，除咗畀呢件貪曾食瞓屙住，同宴客會友之外，仲係成幫特首班子做嘢辦公嘅地方，不少機密資料和文件輾轉的敏感地帶，噢！當然，政府梗係話那些搬運工人不會去到「行人免進」的禁區啦！但我嘅焦點，不是放在呢批勞苦工人身上，而係不放心縮骨貪曾的劣行！

佢除了靜雞雞搬走大批天價貴州茅台酒，和數不清的極品紅酒外，還有好多好多家具雜物，都唔知佢由禮崩府搬走幾多車嘢！

如果，煲呔曾只係做廁所所長，被炒魷後，經實Q Check過，離開公司大門前，無撻幾卷廁紙，便OK啦！但呢件貪心精，乜都貪一餐，點知佢臨走前，有無塞幾支政府鉛筆或筆芯入落啲紙皮箱度㗎！哼！咁都小事，我哋大方啲吧！但，我一定要追問的，就係貪曾同佢老婆收拾細軟時，有乜程序或機制，同埋有乜監察和守則，有無人𥄫住佢哋封箱打包，會唔會有人順手擸走啲香港最機密嘅嘢㗎？對此無誠信嘅貪精，我建議新一屆特首辦，派人重新檢查煲呔運出宮的物件，逐一開晒啲茅台同紅酒，睇吓裏面有無收埋啲唔見得光嘅贓物！睇咗放心啲！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府