政壇：搞搞政：黃錦星說漏嘴 暗示明公布任命

新政府架構仲未獲立法會通過，但新政府班子七月總要上場，盛傳做環境局局長嘅黃錦星（KS）尋日就說漏咗嘴，暗示聽日會有任命公布。

話說KS上任局長前最後一件傑作，就係政府同建造業議會合作發展嘅「零碳天地」，尋日開幕，唔少記者諗住問佢對候任特首梁振英大宅僭建嘅睇法，最初佢爽快答應，話喺活動後再講。

點知活動後到記者問佢有關問題時卻大受阻撓，除咗大會公關話佢唔會回應活動以外嘅其他問題外，又遭建造業議會主席李承仕擋駕，話呢啲問題唔適合呢個場合提問。當講到涉公眾利益問題時，職員至話由KS決定答唔答，最後KS都係反口唔答，仲笑笑口話：「我知呢個係大家關心嘅問題，禮拜四我會回應！」

點解要喺禮拜四回應呢？難道新班子名單當日公布？佢就依然保持微笑話：「大家都明白發生乜事。」之後就隨大會人員離開。