尋日喺中環香港會所食完午飯出嚟嘅保安局局長李少光，忽然變得好健談，仲分享自己嘅退休旅遊大計，話七月中會去加拿大三個禮拜，先去溫哥華探親，緊接去有「牛仔城」之稱嘅卡加利（Calgary）觀光，如果有時間仲會落美國玩吓添！
聽落都幾悠閒吖，但佢就笑言，其實有啲怕退休後日日對住老婆，所以會四出搵嘢做，例如專注做教會事工，咁就唔使日日困喺屋企，而除咗返教會之外，就會湊孫嘞！
李少光話退休後會去教會做事工同湊孫，好過日日對住老婆喎。
