政壇：高永文「探同學」預先收料
盛傳將擔任食物及衞生局局長嘅骨科醫生高永文近日已提早開工，分別透過去醫院及不同場合同前線醫生見面，向佢哋收定料，預備上任後計劃未來五年嘅鴻圖大計。
據聞屯門醫院嘅醫生日前收到電郵通知，話高醫生尋日會到訪，所以引嚟最少十幾二十個醫生到場見佢，好多醫生都向佢反映醫生工時長、工作量大，又有外科醫生話手術設施唔夠等。高醫生話好關注醫生唔夠休息時間，希望日後可先處理呢個問題。此外，醫院多個部門主管都望佢上任後，能夠幫吓屯門居民解決醫療問題。
佢話喺屯門醫院有四個醫生係佢同學，只係約埋去醫院傾吓偈。咁講，可能因為仲未公布特區新班子嘅正式名單，佢只能用探同學方式預先收料。