政壇：沈祖堯勸家長學懂放手

依家唔少家長都對子女溺愛有加，令港孩現象逐漸蔓延至大學，拔尖制度更進一步令大學醫科生「細路化」！

中文大學校長沈祖堯尋日出席電台節目話，近年見到港孩現象入侵大學校園，依家一般家長會比較擔心子女嘅選科同出路問題，每逢中大舉行資訊日、開放日嗰陣，校方都要預留多啲位畀家長，「家長仲肉緊過子女」。原來家長唔止緊張子女學業同選科，連子女嘅工作情況都同樣咁緊張，沈校長話有醫科生畢業後當上醫生，但佢哋嘅家長仍走嚟醫院問佢，點解個仔成日要當夜更。佢呼籲家長要學習「放手」，畀子女自己做吓決定。

襯唔起件白袍

除咗大學醫科生年輕化，連衣着言行都細路化咗！沈校長話：「有啲大學生仲係好似中學生咁，例如着衫、講嘢方式等，好似小妹妹、細路仔咁，有時成唔成熟唔一定同年紀成正比，有啲十八、十九歲都好似細路咁。」所以需要畀多啲時間佢哋成長。佢又語重心長咁話，醫院病房好複雜，如果病人見到穿白袍的醫生，好似細路仔咁，會唔放心，所以會要求醫科生着得整齊啲，更加唔好跳跳紮，走來走去。

沈校長嘅大女都係中大醫科生，所以佢話曾擔心佢係校長個女喺學校會受壓，點知個女答佢：「冇人提起過你喎。」先令佢安心啲。雖然佢話冇參與個女嘅考試同評估，咁耐只係同個女上過一次課，但返到屋企都會做「醫生爸爸」，對個女有關醫學提問都盡量做到「有問必答」。由於平時忙於工作，所以亦希望盡量抽空陪伴家人，以「質素」代替「數量」咁話。