政壇：搞搞政：黃家和挑戰大輝勝算微

九月立法會選舉，工業界嘅議席都有暗湧，力挺前政務司司長唐英年參選特首嘅林大輝就被傳廠商會嫌佢「深唐」色彩過濃，諗住換人出戰，仲盛傳有意挑戰大輝嘅係廠商會會董、餐飲聯業協會會長黃家和（Simon）。廠商會會長施榮懷（Irons）就話，會繼續支持大輝角逐連任，又話暫時未聽到有高層唔支持大輝喎，咁樣嘅話，大輝基本上可算抱穩咗個議席，黃家和想入局，都只能循飲食界出戰。

Irons話，佢哋任何會員都可以參選，但轉過頭又話希望廠商會團結一致支持大輝喎。咁算唔算講到明Simon機會微呢？一直未決定循飲食界或工業界出選嘅Simon似乎屬意工業界多啲，事關佢話餐飲業多數屬於本地生意，但工業就國際化得多，而做生意亦要向外睇遠啲，暗示係想搶攻工業界議席。不過，佢話短期之內都會有決定。

工業界之外，勞工界一樣有暗湧，勞工界三個議席中，港九勞工社團聯會（勞聯）嘅現代表李鳳英做咗三屆議員，亦要搵後輩接棒，估計七月常委會開會後，好大機會敲定由現任勞聯主席潘兆平接英姐嘅位。