通脹之虎猶在 基層之苦無奈

基層生活有幾艱難，睇兩個數字就知。

一個係反映貧富懸殊嘅堅尼系數。喺「痛心特首」曾蔭權管治之下，香港嘅堅尼系數堅挺咯，創下四十年新高，基層生活苦過弟弟，都唔使嘥口水多講啦。

另一個咯喎，就係通脹率。呢樣亦唔使太一叮多解釋，一句話講晒：通脹猛於虎，窮人實淒苦，叮！

好嘞，堅尼系數如狼似虎，通脹老虎又係點呢？咁啦，不如睇吓官方嘅最新數字先啦。統計處公布，五月份綜合消費物價指數係百分之四點三，比四月份微跌零點四個百分點。如果剔除一次性紓困措施，五月份通脹率仍達百分之五點一o架。政府解釋話，通脹放緩主要因為私人房屋租金升幅收窄。

咦，照咁講，市民係咪已經逃離通脹猛虎嘅血盆大口呢？係就好咯，可惜唔係。無錯，通脹係就係有輕微回落，但係睇真啲就知係假象。其中衣食住行樣樣加，食品價格最勁，升咗百分之八點五。

通脹鬥窮人，百物騰貴，一般市民都吃不消啦，何況係基層市民？尤其食物係咁起價，基層受影響最大，真係無啖好食o架。所以話，所謂通脹放緩，不過係數字遊戲嚟啫，大家千祈唔好咁天真吖！

如果話貧富懸殊惡化係煲呔曾七年管治失德敗政嘅有力註腳，咁基層飽嘗通脹之苦就係煲呔曾冷血無能嘅真實見證。港府窮得只剩下錢，庫房年年水浸，但係對基層斤斤計較，放水扶貧餐餐唧牙膏咁唧。咁都未算，港府做大股東嘅港鐵仲要帶頭加價，推高通脹，你話係咪麻木不仁吖？

講到煲呔曾嘅無能咯喎，兒童發展配對基金高層就有咁嘅批評，佢話煲呔曾政府處理貧窮問題短視，政策思維過於簡單，所以令到貧窮家庭欠缺向上流動力。大家話嘞，基層被通脹老虎折騰到死去活來，煲呔曾係咪應負最大責任吖，叮！

話時話，煲呔曾漠視通脹老虎噬人，其實都易理解嘅。所謂飽漢不知餓漢飢，煲呔曾住一晚總統套房都五萬蚊，搬出禮賓府嘅家當都成千箱，美酒佳釀數之不盡，又點會知道通脹對基層造成嘅痛苦吖？古時朱門酒肉臭，路有凍死骨，今日貪曾酒肉臭，通脹噬人骨，老百姓一樣咁慘。

一個不斷上升嘅堅尼系數，一個居高不下嘅通脹率，再加一個低處未算低嘅民望指數，就係煲呔曾七年管治嘅寫照。候任特首梁振英重設扶貧委員會，最緊要記住一樣嘢，以貪曾為戒，叮！