政壇:政商定格:龔嬿鮮花為伴嚇怕追求者
出身珠寶世家嘅Yvonne龔嬿喺英國讀考古,從小喺「花海」成長,媽媽喺中環開花店,佢小小年紀已穿梭大小喜宴,幫手布置場地。不過,佢嘅兄弟姊妹無意經營花店,佢唔忍心媽媽辛苦三十幾年嘅心血就此枉費,八年前就拍心口擔大旗,見客、訂花、布置場地等一腳踢,變身「鮮花公主」。
但係花店太子女唔易做,遇上奄尖客人,一樣被鬧到體無完膚。佢自爆曾九十度彎腰向客人鞠躬道歉,但幸好辛苦耕耘下,已累積唔少名人客。今年係婚嫁好年頭,定單接唔停,搞到佢連拍拖都冇時間,唔少追求者眼見佢日日與花為伴,都唔敢送花表達愛意,佢就甜笑話:「係女仔都鍾意驚喜,有人送花,我都冧o架!」
今年係嫁娶好年頭,「鮮花公主」龔嬿忙到冇時停。(受訪者提供)