政壇：政商定格：張曼娟畀學生勸返台教書
光華新聞文化中心主任張曼娟月底離任，尋日喺告別記者會中，慎重澄清辭職同上司台灣文化部長龍應台無關，話外界總認為兩個女人必定掀起戰爭，或者兩位喺文壇上叮噹馬頭嘅文人必有「瑜亮情結」，係以舊眼光看待事件。雖然佢努力澄清，但都係解釋唔到點解從官之路只有九個月，似乎兒戲咗啲。
張曼娟詳細交代辭官過程，事緣去年來港履新時，佢同任教嘅大學請假一年，今年二月收到大學寄嚟嘅選課單，學生又發起溫情攻勢，要佢返台重執教鞭，所以三月決定辭職，四月就遞咗信，當時未上任嘅龍應台有份勸佢留任添！無論點都好，才女話好珍惜喺香港嘅日子，仲話書展時會返港發布新書《今日香港有煙霞》，本書收錄佢駐港期間嘅文章，當係人生足迹嘅留念。
張曼娟稍後將返台重執教鞭。