政壇：搞搞政：阿涂選超級議席危危乎

白鴿黨早前忽然變陣，由原定派出一老一少、即現任立法會議員涂謹申同葵青區議員尹兆堅出戰超級區議會，改為派出兩隻老鴿、黨主席鐵頭仁夥拍阿涂參選，希望可以力爭兩席，但隨即又爆出兩人分區大細超，偏幫鐵頭仁。

據聞，該黨決定改派鐵頭仁出選後，雖然相應地將屬於新界東嘅北區同半個大埔區撥畀阿涂，希望將兩人嘅選區人口戥番勻，但眾所周知北區係該黨最弱嘅其中一個區，大埔亦因前黨友鄭家富退黨而元氣大傷，計落阿涂其實冇乜着數。

再加上阿涂喺黨內嘅支持者同人緣遠遠唔及鐵頭仁，據聞九龍西以外嘅部分地區黨友，對力撐阿涂參選超級議席反應冷淡，港島區亦唔見阿涂嘅橫額，而鐵頭仁之前掛開嘅部分橫額依家都未拆，令阿涂最近周圍大叫救命。

喺鬼打鬼之下，白鴿黨可能贏唔到兩席，反而犧牲咗培育多年嘅阿涂同新入黨嘅尹兆堅，咁就真係自作孽囉！