政壇：孫公退休鑽研跑馬統計學
教育局局長孫明揚仲有九日就任滿，之後做乜呢？孫公尋晚同傳媒餞別時話，佢已經買定統計學嘅書，諗住結合過往佢對跑馬投注模式嘅研究，鑽研跑馬嘅統計數字。
佢話早計劃好退休後要過有紀律嘅生活，每日要驗血，檢測血糖、血壓、體重等，交功課畀醫生，諗住日後朝早係學習時間，午飯後至同啲「壞朋友」去hea吓。至於佢早前跌斷嘅手已康復得七七八八，就算打麻雀都可以反牌。
另外，運輸及房屋局局長Eva鄭汝樺尋日亦同傳媒臨別茶敍，仲破天荒展示幾幅結婚相同一家四口嘅溫馨家庭照，睇相至知Eva細個係長腿少女，而佢老公就高大英俊、官仔骨骨，有幾分似前麗的演員林國雄。Eva話離開官場後會去玩番夠本，三個月去四個旅程，之後就再諗吓做啲非牟利慈善工作，但絕對唔會幫私人機構打工。