測微粒雙重造假 環保署雙重謀殺

PM2.5，呢個唔係時間嚟嘅，而係微細懸浮粒子，因直徑小於二點五微米而得名。嗱，咪睇小佢哋呀，佢哋唔止損害市民嘅心臟同血管，仲會致癌添，堪稱隱形殺手。

PM2.5咁得人驚，點預防呢？即係咁，環保署迫於壓力，三個月前開始實時公布有關數據，畀市民參考，知所警惕，大家知唔知結果點呢？

犀利咯，包你估唔到，三個月嚟只係得一日超標！環保署話喎，四月廿一日銅鑼灣路邊監測站錄得PM2.5，喺過去廿四小時平均每立方米九十三微克濃度，超標約兩成半。咁即係話，其他日子空氣質素全部合格。

唔係啩，PM2.5低到咁離奇，香港「污染之都」嘅外號咪可以除名？曾蔭權七一下台，香港官場嘅烏煙瘴氣就話有望改善啫，唔通維港上空嘅混濁空氣都識得自動消失？環保署呃到細路哥，都呃唔到市民個鼻哥啦，叮！

環保團體踢爆，環保署所謂嘅PM2.5檢測數據，根本係自欺欺人，雙重造假。

第一假，就係數據指標弄虛作假。根據世衞標準，每立方米嘅PM2.5濃度係不應超過廿五微克嘅，而港府嘅標準係七十五微克，比世衞寬鬆得多！環保團體以世衞標準套用喺全港十四個監測站，結果發現全部超晒標，其中三個路邊監測站更加係重災區，銅鑼灣嘅超標日數高達七十一日！

第二假，所謂嘅監測站假過鬼。環保署將一般監測站設喺人煙稀少嘅天台，採樣高度至少距離地面十米，部分監測站更加包攬多個區份添。正如環保團體批評：「隔一條街數據都唔同啦，更何況啲監測站人同車都去唔到，根本反映唔到市民呼吸嘅空氣實況。」

叮佢個鎯鎯，港府施政脫離民意，諗唔到連監測空氣污染都脫離現實，點會唔禍港殃民吖？環保團體講得啱，當局怕污染日日超標捱轟，不惜以市民健康作賭注，蓄意報細數。

喂，港府為粉飾太平而對污染數據弄虛作假，同謀殺市民冇乜分別嘅咋！早前有報告指，由於空氣污染嚴重，過去七年香港平均每年有一千人提早死亡。環保官僚治污不成，仲要對空氣質素數據雙重造假，咁做何止係雙重丟架，簡直係雙重謀殺！

嗱，無論邊個做下屆環境局局長都好，拜託快快撥亂反正，一來救救香港人，二來咯喎，閣下都唔想成為殺人犯o架，叮！