政壇：搞搞政：鬍鬚曾夾嘴形抄CY用語

土地問題係候任特首CY梁振英最關注嘅問題之一，財爺鬍鬚曾尋日喺網誌總結過去嘅土地政策，成篇文出現「土地」兩個字成二十四次咁多。佢話有六招，包括更改土地用途、重建、收地、維港以外填海、發展岩洞同重用舊石礦場，又話經過公眾諮詢後，大部分市民普遍都唔反對「六管齊下」，有信心短期內釋放一百五十公頃土地，跟住仲話依家有三十公頃工業用地，可以改為住宅用地。

可能臨近上司換人，鬍鬚曾急CY所急，講嘅嘢亦愈嚟愈似CY，唔單止議題啱嘴形，連用字都似，佢話近年香港人經常表達「香港是我家」呢個訊息，所以土地供應對港人非常重要，只要喺土地政策方面「持之以恒」、「不斷優化」，就可以解決「社會經濟矛盾」。如果唔講畀人聽，仲以為係CY撰文。　鬍鬚曾被嘲為史上最廢財爺，但CY話明佢嘅團隊一定要有政治能力，今後又多咗個副司長做長遠開拓嘅工作，佢梗係要積極同長進啲啦！