政壇：大舊新西火併阿牛

自拉布戰後，人民力量近期嘅氣勢上升，尋日佢哋公布立法會直選各區布陣，一如所料，黃毓民同黃洋達分別出戰九龍西同九龍東，但最特別係新界西分拆兩條隊，一隊係「大舊」陳偉業拖住三隻樁腳，另一隊係麥業成單打獨鬥，咁擺位其實都幾冒險。

喺○八年嘅選舉，新界西只得大舊打正激進旗號，亦係最後一席入立會，選情絕對唔係穩穩陣陣。但今屆大舊喺新西首先要面對黨友麥業成分薄票源，仲有都屬於激進勢力嘅社民連「阿牛」曾健成同佢爭，阿牛上屆有成萬票，今屆就算空降，實力都唔可以忽視，而且大舊○八年以社民連身份選，有幾多社民連支持者會過戶撐阿牛，真係好難估。

之不過，睇大舊拖三隻樁腳出戰，唔止係培養新血咁簡單，反而似係想靠啲樁腳吸多啲票，封咗社民連條水，穩固自己嘅席位兼撼低阿牛。

維園阿哥冇得選

其實，人民力量港島區選情亦危危乎，佢哋決定派出主席劉嘉鴻同「星屑醫生」歐陽英傑雙雙出戰，但兩人知名度只停留喺互聯網上，現實世界唔多人識佢哋。

人民力量五區名單中，都見唔到「維園阿哥」任亮憲，佢曾經紅絕「城市論壇」，但始終同黨友唔係好夾，據聞亦係因為呢個原因冇得選。可能佢自己都覺冇癮，前日已宣布退出人民力量，但退出原因係由於工作繁忙喎，呢個原因可唔可信，大家心中有數。