毒豉油流播神州 奸商貪官等天收

世上如果有「最具創意食品獎」，內地嘅黑心食品肯定獨領風騷，年年冠軍。呢嗱，繼福美胂蘋果同瀝青燒味之後，內地黑心食品又有新出品，就係工業鹽豉油嘞！

件事係咁嘅，廣東佛山有間叫「威極」嘅豉油生產商，最近唔慌唔威到極嘞，被揭發購買咗七百六十噸非食用工業鹽水，製造過千噸有毒豉油，事件震驚全國。

嗱，呢單毒豉油醜聞真係搞到全中國人心惶惶o架。據調查，其中六十五箱毒豉油已經售往廣東陽江，直接流入消費者手中。更恐怖嘅係，大部分毒豉油成品同半成品已經賣咗畀珠三角多家調味品企業，加工後再賣畀全國各地嘅餐飲企業，呢鋪真係全國餸菜一樣「毒」咯，叮！

毒豉油流播神州，香港人都幾難獨善其身。你知啦，豉油係中國人嘅入廚聖品，港人北上消費，唔通一邊尋歡，一邊辟穀咩？福美胂蘋果可以唔食，瀝青燒味可以避開，黑心豉油避無可避呀，老友！醫學界警告，工業鹽毒豉油危害極大，市民食咗輕則中毒生癌，重則馬上死亡，唔講得笑o架！

講到呢度，大家係咪想叮爆個無良奸商呢？即係咁，黑心食品日日有，今次奸商大不同，威極嘅幕後老闆原來係一個香港人。

所以話，香港愈嚟愈內地化，內地貪官橫行，香港一樣出咗件「第一貪官」曾蔭權；內地黑心奸商氾濫，香港家陣亦有一個毒豉油奸商，真係天下烏鴉一樣黑。

講番黑心食品，佢哋創意無限，真係唔到你唔服！食品種類層出不窮都算嘞，同一種食品都可以推陳出新，鑊鑊新鮮鑊鑊甘。黑心豉油唔係新發明嚟o架嘞，前年有頭髮豉油，上年出化學豉油，今年變工業鹽豉油，遲啲又唔知有乜驚喜畀大家。

內地官媒播《舌尖上的中國》，講中國傳統美食文化，其實，不如轉講中國嘅黑心食品啦，由最惡心嘅坑渠油講起，一晚講一樣，肯定變史上最長壽節目呀！

咪話太一叮唔提醒港府，內地黑心食品氾濫成災，千祈唔好又把關失職，害人害物呀。至於嗰啲無良奸商同包庇罪行嘅內地貪官咯喎，小心多行不義必自斃！

一句講晒，毒豉油流播神州，奸商貪官等天收。嗱，曾蔭權，唔係話你呀，不過如果閣下對號入座，咁又唔拘，起碼等你知驚，一日未落台，都要做好你份工，唔好狂貪暴舔，更加咪畀黑心食品流入香港，毒害港人，叮！