政壇：搞搞政：馮煒光退黨 怒燒白鴿

白鴿黨南區區議員馮煒光被踢爆應徵新一屆政府副局後，白鴿黨高層震怒，車輪轉鞭撻佢「賣黨求榮」，仲話要發起聯署革除佢黨籍。捱打多時卻一直潛水嘅馮煒光尋日卒之出場，發表以「我以我血薦軒轅」為題聲明，仿似血書般申訴港人有擇業自由，但佢想講嘅只不過係退黨啫。呢招反面燒白鴿，搞到白鴿高層又亂過。

馮煒光同黨友訣別嘅「血書」中話，《基本法》內規定「香港市民有選擇職業的自由」，求榮同工作自由拉上關係，搞到白鴿主席鐵頭仁都要拿拿聲回應，話黨員如果未經中委會同意，不得接受公職任命嘅規定，係載入咗喺黨嘅行為守則裏面，一於你講港法，我講黨規。

呢齣肥皂劇嘅風波未見結局，但白鴿亂晒龍就係人都見，尋日佢哋又開會傾九月立法會選舉名單，一度放晒風想搵高達老婆、屯門區議員陳樹英出選新界西，但又有傳擔心佢唔夠吸引力。白鴿黨內外一團糟，睇怕好難走唔出舊人霸位、新人反斗嘅亂局，九月立法會選舉真係危危乎。