政壇：毓民倒曾鈺成得個講字

立法會早排審議出缺安排時﹐人民力量同社民連為拖垮《議席出缺安排條例草案》，發起拉布戰，結果立法會主席曾鈺成突然出手剪布。「布」戰之後，雙方都有唔少手尾，泛民主派同建制派兩方面更因事件失晒預算，譬如人民力量黃毓民已成功抽到籤喺本月二十七號立法會大會上向曾主席提出不信任議案，不過，毓民呢個如意算盤未必打得響。

雖然毓民呢個議案就算通過都冇實際作用，加上肯定過唔到，但至少畀機會大家傾吓，等人知道泛民有幾唔妥曾鈺成。但係，早排嘅拉布戰拉咗唔少會議時間，令到大量議員議案積壓，毓民呢個不信任動議一定會被押後，計計埋埋，隨時拖到過咗七月十八號會期完結都未必傾到。

講到人民力量，成員黃洋達（皇上）早前選擇提早入獄服刑，但長毛尋日司法覆核成功，有網民戥皇上坐監唔抵。皇上就叫大家千祈唔好咁諗，月底會有兩場「棟篤笑」表演，如果唔係坐咗監嘅話，可能連場地都訂唔切。又係嘅，佢因呢次事件賺到唔少人氣添。