鄉郊保育齋噏 龕場遍地開花

花草樹木對城市來講，作用等同人嘅肺部。本港郊野公園覆蓋六成面積，本來茂林修竹，鳥語花香，弊在港府昏庸無能，綠化買少見少，城市之肺不斷「病變」。

呢嗱，大埔沙螺洞鄰近八仙嶺郊野公園，既係市民行山勝地，又係好多蜻蜓、蝴蝶同過百種雀鳥嘅棲息地，更有「螢火蟲樂園」之稱，生態價值僅次於米埔。有發展商竟然計劃喺當地興建有六萬個龕位嘅大型骨灰龕場，估計要砍伐大片林木，對生態環境造成永久性破壞。

太一叮諗極都唔明，香港大把地方適合建龕場，使唔使揀喺沙螺洞咁優美嘅地方呀。奇就奇在，當局對反對聲音詐聽唔到，居然批准有關項目嘅環評報告公開諮詢。難怪有人質疑，當局唔等下屆政府重新檢討自然保育政策就匆匆推出諮詢，有利益輸送之嫌。十個環保團體發表聲明，要求當局叫停建骨灰龕，將沙螺洞納入保育範圍，否則以司法覆核對付。

查實，港府鄉郊保育大隻講，市民早已見怪不怪。呢，前排本報踢爆，有人懷疑喺蒲台島違規興建墓園，令呢個「香港南極」淪為「千墓島」；本港攝影發燒友影日落嘅首選地點元朗白泥亦面目全非，有官地畀人非法圍封佔用，建造私人墓園。

話時話，私人墓園遍地開花，生態環境備受威脅，呢啲個案都只係冰山一角咋。歸根究柢，當局興建公營龕場一直唱慢板，致使骨灰龕位長期供不應求，市民輪候公營龕位望穿秋水，先人往生之後隨時要做三五七年游魂野鬼。嗱，計埋曾蔭權「區區有骨灰龕」嘅吹水大計，未來五年最多只能提供約十二萬個公營龕位，相對於同期超過廿四萬個需求量，簡直係杯水車薪。

供求嚴重失衡，骨灰龕一位難求，奇貨可居，咪導致違規無牌龕位氾濫成災囉，霸官地嘅又有，僭建嘅又有，但當局一於闊佬懶理，放軟手腳。所以話，正係呢班低能高官害到香港人想死唔敢死，想葬又冇得葬！

綠水青山枉自多，市民無奈廢官何。煲呔曾上台七年，一味貪威識食，胡混度日，搞到香港七國咁亂，唔止城市之肺病變，成個政治環境同社會生態亦出現病變，好彩天有眼，再過十幾日港人可以齊齊送瘟神喇，叮！