政壇：搞搞政：周一鑊咒發叔末期病人？

唔少高官做嘢都好官僚，人辦之一就係就執包袱嘅食物及衞生局局長周一嶽（周一鑊），尋日佢喺立法會回應議員有關專為末期病人而設嘅「預設醫療指示」嘅質詢時，懶醒咁話呢啲資料同指示已上晒網，市民隨時可下載。七十五歲嘅鄉議局主席劉皇發隨即質疑，話好多長者都唔識上網。周一鑊一呆，之後竟然話如果發叔想了解佢可以親自講解畀對方聽，呢吓輪到發叔冇晒表情。執行議員工作，邊個想畀人咒o架？

尋日有議員口頭質詢香港落實「預設醫療指示」嘅進度，即係畀末期病人有能力作決定時，自行決定如果病危、昏迷或者處於持續植物人情況時，使唔使醫生繼續進行明知無效果嘅治療。周一鑊官僚咁話上晒網喇，議員當然唔會滿意。正如發叔所講，長者唔識用電腦，而且重症患者都未必有能力用電腦喇，結果係你有你上網，病人依然矇查查。

發叔問有冇其他途徑睇到呢類資料，周一鑊竟話除非有關人士病情嚴重，否則無需理會，咁樣講即係推卸責任啫，唔通夕陽政府官員嘅服務態度就係咁？