立法會新大樓尋日首次舉辦捐血日，六十個議員中，只得六個人參加，多數係泛民主派議員。第一個去宴會廳捐血嘅係白鴿黨李永達（高達），佢話每年會捐三至四次血，尋日捐咗唔夠十分鐘就搞掂。高達嘅黨友涂謹申原本都諗住去捐血，但紅十字會職員話佢體內嘅鐵質未達標唔畀佢捐。
議員唔踴躍啫，但就有五十三位議員助理及秘書處職員同埋十位市民響應呢個一年一度嘅捐血活動，撇除一眾尊貴嘅議員，尋日嘅成績算係不過不失啦！
李永達係第一個去宴會廳捐血嘅議員。
