政壇：一個書獎三前高官喜相逢
退出官場嘅人有乜共同嗜好？可能係書！尋日一個關於書本嘅頒獎活動，就見到三個曾經做過政府高官嘅人喜相逢，佢哋係綽號「庸官殺手」嘅前公務員事務局局長王永平，同埋分別掌管經濟、衞生福利嘅葉澍堃同黃錢其濂。其中黃錢其濂久未露面，但仍神采飛揚。
王永平尋日獲主辦團體安排做頒獎嘉賓，負責頒獎畀港英時代最後一任中央政策組首席顧問顧汝德創作嘅《官商同謀》，作者雖然冇現身，但本書重點披露當年政府如何與華資商界同謀合作，令民主發展及社會公義賠上沉重嘅代價。淨睇書名已令人會心微笑，事關同現時人人喊打嘅貪曾行徑不謀而合。
平叔話自己乜書都會睇，近排就睇報紙多啲，因為「好好睇」喎，引起現場一陣笑聲。咁係咪因為有好多佢老友嘅消息呢？平叔就面色凝重話：「有啲嘢係笑唔出o架！」
葉澍堃（左）、王永平（右）同黃錢其濂因書而聚頭，三個前高官共同話題都多啲。