政壇：老鴿出籠圍剿馮煒光

白鴿黨南區區議員馮煒光同四名年輕黨員申請做下屆副局長同政治助理，東方報業集團獨家踢爆事件後，白鴿黨高層先如夢初醒，騰騰震下一連兩日補鑊，聲言要懲罰四隻「乳鴿」，仲狠批馮煒光「賣黨求榮」，要革除佢嘅黨籍。白鴿黨高層治黨無方，出咗事就一味靠鬧，真係羞家。

馮煒光「求榮」事件曝光後，白鴿黨一眾「老鴿」無不出盡力狂轟，同之前該黨前總幹事陳家偉到尖沙咀香檳大廈「訪談」相比，盡見一班老鴿相當憎恨馮煒光。李永達尋日就開火炮轟馮「賣黨求榮」，決定搵黨友聯署踢走佢，仲話馮煒光做咗咁多年區議員，實力有幾多，大家心中有數喎！

張文光亦話馮煒光言論立場向來都同黨好唔同，但估唔到佢會以行動背叛黨，黨團召集人李華明被問到黨內有無黨友幫馮煒光講好說話時，竟然回敬一句：「乜佢有朋友咩？」反而平時火爆嘅副主席劉慧卿最留情，話自己身為副主席唔會加入聯署，只係叫馮煒光自己走人算數。點都好，事件揭發白鴿分歧處處、同床異夢已非一朝一夕嘅事，九月選舉真係危機處處！