政壇：長毛金勞詹為囚友維權

因衝擊替補機制諮詢會（現稱為「出缺機制」）而被判入獄嘅社民連立法會議員梁國雄（長毛），一早揚言為無礙九月參選立法會選舉，決定取消上訴即時坐監，預計聽日就會入獄。尋日立法會開大會咁啱有個議員質詢係關於在囚人士嘅，長毛好踴躍發問，質疑當局要求在囚男士每三星期用一卷廁紙係太苛刻，同樣坐過監嘅議員詹培忠（金勞詹）都質疑當局限制多多，連囚犯自資買豉油都唔畀，搞到保安局局長李少光都話要跟進吓。

每日八格唔夠用

長毛尋日積極爭取囚犯福利，有議員質疑佢即將入獄，忽然關心在囚福利係咪有利益衝突之嫌﹖長毛就話事件純屬巧合啫。佢話在囚男性每三個星期先獲發一卷廁紙，攤開嚟用，每日平均只得八格，點合乎衞生需要呀﹖李少光話，向在囚人士定期派發廁紙嘅做法行之有效，如果有個別在囚人士需要額外廁紙，懲教署職員都會按需要酌情處理。

長毛有不滿，曾經因偽造文件而被判監三年嘅詹培忠亦加入爭取囚犯權益行列，佢唔滿意當局提供畀囚犯自資購買嘅零食同貨品種類唔足夠，譬如唔包括即食麵同豉油，話有關安排有虐待之嫌。亦有議員覺得在囚人士每次淨係可以講三分鐘電話係太少，又有議員批評當局只容許囚犯喺星期六朝早播放卡通片時段睇電視，係漠視佢哋嘅娛樂需要喎！

議員咁多質疑，李少光回應時話在囚人士對只准傾三分鐘電話似乎無乜意見，仲話如果唔係議員講起，佢都唔知在囚人士對睇卡通片同唔准買豉油感到不滿，雖然任期將屆滿，但光哥都話會跟進有關安排。唔知長毛入冊時呢啲安排改善咗未呢﹖